სამონასტრო კომპლექსი



ჩვენ ერთად ავაგებთ ტაძარს, რომელიც გაგვაერთიანებს!


სრულიად საქართველოს კათოლიკოს–პატრიარქის, უწმიდესისა და უნეტარესის ილია II ლოცვა–კურთხევით, თბილისში, მახათას მთაზე, შენდება ივერიის ღვთისმშობლის ხატის სახელობის ტაძარი და სამონასტრო კომპლექსი.

2010 წლის 24 მაისს ფონდ "იავნანას" აქციაზე სრულიად საქართველოს კათოლიკოს–პატრიარქმა ილია II ქართველ ერს აუწყა ისტორიული მშენებლობის შესახებ და კურთხევა მოგვცა ყველას განურჩევლად ეროვნებისა, წოდებისა, განათლებისა თუ ეკონომიკური მდგომარეობისა, გავერთიანდეთ და თანასწორი წვლილის შეტანით ერთად ავაშენოთ ეს უდიდესი სულიერი სავანე.

ეს მართლაც უნიკალური მშენებლობა და სახალხო აქციაა, რადგან ტაძარს მთელი საზოგადოება, საქართველოში მცხოვრები ხალხი და მთელი ქართული ემიგრაცია ერთად აშენებს. მსოფლიოში მრავალი ტაძარი აშენებულა რომელიმე ორგანიზაციის ან ბიზნესმენის თანადგომით, მაგრამ მახათას მთაზე ივერიის ღვთისმშობლის ხატის სახელობის ტაძარი გამორჩეულია თითოეული ჩვენგანის თანაბარი მონაწილეობით და იგი ჭეშმარიტად ქართველი ხალხის ერთიანობის, სიყვარულისა და ყოვლადწმიდა ღვთისმშობლისადმი გულითადი თაყვანისცემის სიმბოლოდ იქცევა. ამ მშენებლობაში მთავარი სწორედ ჩვენი ერთიანობაა ღვთისმშობლის გარშემო, რომელიც სულიერად გამთლიანებულ ერს გაუძღვება ღვთისაკენ მიმავალ გზაზე.

მახათას მთაზე ღვთისმშობლის სავანის აგებით, ყოველი ჩვენგანი უპირველეს ყოვლისა, ააგებს საკუთარ სულიერ ტაძარს, თავად გახდება ტაძარი ღვთისა, ჭურჭელი სულისა წმიდისა, რისთვისაც არის კიდეც მოწოდებული ადამიანი.

მახათას მთაზე სამონასტრო კომპლექსთან ერთად განთავსდება ასევე საგანმანათლებლო ცენტრი, რომელიც ხელს შეუწყობს საქართველოში ქრისტიანული სწავლების გავრცელებას, თავშესაფარი ობოლი და მზრუნველობამოკლებული ბავშვებისათვის, მონასტერთან ასევე დაფუძნდება ნარკოლოგიის სარეაბილიტაციო ცენტრი.

სრულიად საქართველოს კათოლიკოს–პატრიარქის ილია II ლოცვა–კურთხევით პაატა ბურჭულაძის მიერ დაარსდა ივერიის ღვთისმშობლის ხატის სახელობის ტაძრის მშენებლობის ფონდი "ივერიისა", რომელიც სათავეში ჩაუდგა აღნიშნულ პროექტს. ფონდ "ივერიისას" ოფიციალური წარდგენა გაიმართა 2010 წლის 14 სექტემბერს. ფონდისთვის პირველი შემოწირულობა მისმა უწმიდესობამ თავისი წინაპრების, ქართველი მეფეებისა და პატრიარქების სახელით გაიღო.

ფონდ "ივერიისას" მიერ შემოთავაზებული უნიკალური სქემა ყველა ადამიანს აძლევს აქციაში თანაბარი მონაწილეობის საშუალებას. ნებისმიერი შემომწირველი, შეწირული თანხის ოდენობის მიუხედავად, 1 ლარს წირავს თავის სახელზე, ხოლო დანარჩენ თანხასთავისი ახლობლების, ოჯახის წევრების, გარდაცვლილი წინაპრების ან სოციალურად დაუცველი ადამიანების სახელზევისაც არ აქვს მატერიალური საშუალება შეეწიოს ტაძრის მშენებლობას. სწორედ ამაში მდგომარეობს აქციის თანასწორობის უნიკალური პრინციპი. იქმნება ცოცხალთა და გარდაცვლილთა წიგნი, რომელშიც ტაძრის აღმშენებელი მილიონობით ქართველის გვარ–სახელი ჩაიწერება.



2011 წლის 12 მაისს, ანდრია პირველწოდებულის ხსენების დღეს, სრულიად საქართველოს კათოლიკოს–პატრიარქმა მახათას მთაზე, მთავარი ტაძრის საძირკველი აკურთხა. ცერემონიალზე დასასწრებად, საქართველოს ოცდათვრამეტივე ეპარქიის მრევლი ჩამოვიდა, თბილისს მსოფლიო საპატრიარქოს წარმომადგენლები ეწვივნენ. საქართველოს კათოლიკოს–პატრიარქმა ამ მშენებლობას ისტორიული მოვლენა უწოდა.

წმიდა სამების საკათედრო ტაძრის შემდგომ ღვთისმშობლის სავანის მშენებლობა მახათას მთაზე არის კიდევ ერთი საშუალება ჩვენი ერის მიერ ღვთისაგან განშორების ცოდვის მონანიებისა. მე–20 საუკუნეში ღვთის თაყვანისცემის შეჩერება საყოველთაო ხასიათს ატარებდა. შესაბამისად, უფალთან დაბრუნება საერთო სახალხო საქმეა. სწორედ ამიტომ უწოდა მისმა უწმიდესობამ ამ ტაძარს ქართველი ერის მეორე ავტოპორტრეტი. ეს მშენებლობა კიდევ უფრო მეტად დაგვაახლოვებს ჩვენს ზეციურ მფარველთან და განგვამტკიცებს ღვთისაკენ მიმავალ გზაზე.


ტაძრის მშენებლობა 2012 წლის 17 აპრილს, ივერიის ღვთისმშობლის ხატის ხსენების დღეს დაიწყო. მშენებლობის ვადა კი მხოლოდ ჩვენს კეთილ ნებასა და ჩვენ მიერ გაღებულ შემოწირულობაზეა დამოკიდებული.



 
 
Created by: Proservice